اوبريت احنا ولاد النهاردة - المجموعة*
كلمات: سيد حجاب | الحان: عمار الشريعى
افتحي افتحي لنا قلبك الصافي وخدينا
وافرحي افرحي ببكرة اللي بيقرّب علينا
واحلمي بكره اجمل م النهارده وبكرة لينا
تسلمي سلمي لنا المسئولية..سلِّمينا
احنا زهرة شبابك وهواكي بيسري فينا
بالدم نصون ترابك ونعيد أمجاد ماضينا
احنا ولاد النهارده بكره أمانة ف ايدينا
إرادتنا الحرة واحدة ونادينا ح تلاقينا
يا بلادي
في هواكي يا عروسة النيل
ح نعدّي من ليل الويل
وان تاهت في الليل خطاوينا
بتكوني نجمة ودليل
علي صدرك نرتاح ونغني
بترابك كفنا متحني
واطلبي ما شئتي.. واتمنِّي
نفديكي بروحنا.. وده قَلِيل
يا بلادي
بالسماحة اللي ف عينيكي علِّمينا
بالصراحة اللي ف عينينا اتحمّلينا
زي ما آمنَّا بيكي آمني بينا
.. آمني لينا..أمِّنينا طمنينا
كوني لينا نهر خير بالعدل يتقسِّم علينا
يا بلادي
علي نيلك يا عروسة النيل
في القمرة تحلا المواويل
وان غابت قمرة أحلامك
نسرج لك عمرنا قناديل
من صبرك ياما اتعلِّمنا ولحبك كلنا سلِّمنا
وف ليلك بالفجر حِلِمنا
وبحبنا ح نشيلك شيل
يا بلادي
مين ح يبني مصر يا ولاد مصر مين؟
غير ولادها الطيبين المخلصين
اركعوا علي ارضها لله وصلّوا
وارفعوا راسكم قصاد قهر السنين
واطلعوا بمصر الأبية العربية للأعالي
واسبقوا الشوق والحنين
مصر مهد الحب مجد الإنسانية
مصر حرة بشعبها الحر الأمين
يا بلادي
احنا زهرة شبابك وهواكي بيسري فينا
بالدم نصون ترابك ونعيد أمجاد ماضينا
احنا ولاد النهارده بكره أمانة ف ايدينا
إرادتنا الحرة واحدة ونادينا ح تلاقينا
يا بلادي
(*) اشترك فى الغناء:
سوزان عطية
محمد الحلو
ايمان الطوخى
توفيق فريد
- 1983 -
ليست هناك تعليقات:
إرسال تعليق